WANANCHI SIMAMIENI MIRADI KATIKA MAENEO YENU

Imewekwa Tarehe: November 21st, 2023

WANANCHI SIMAMIENI MIRADI KATIKA MAENEO YENU

Mkurugenzi Mtendaji Halmashauri ya wilaya ya Rungwe Bwana Renatus Mchau  amefanya ziara katika miradi mbalimbali ya maendeleo ikiwemo ujenzi wa zahanati ya Matwebe, Ujenzi wa bweni katika shule ya sekondari Masukulu, upanuzi wa zahanati ya Masoko, Kituo cha afya Iponjola , Rungwe sekondari pamoja na ujenzi wa shule Mpya Mchepuo wa Kingereza ILENGE kata ya Kyimo.

Katika ziara hiyo Bwana Mchau ameagiza mafundi wote wanaotekeleza miradi ya maendeleo kuzingatia weledi , Maarifa pamoja na  Ujuzi ili ikamilike katika ubora na kwa wakati.

Aidha ameagiza mafundi wote walioshindwa kuzingatia taratibu za ujenzi kubomoa kwa gharama zao na hivyo kuepukana  na tatizo la kuingiza serikali  katika gharama zisizostahiki.

Amesema serikali inayoongozwa na Dkt Samia Suluhu Hassan inatoa fedha nyingi kwa ajili ya kugharamia miradi ya maendeleo fedha ambazo wananchi wangechangishana mifukoni.

Kwa hatua hiyo amewakumbusha wananchi kusimamia miradi yao ipasavyo badala ya kuwaachia mafundi wakitekeleza bila usimamizi.

Aidha amesisitiza viongozi katika ngazi ya vijiji, kata, elimu na afya kuhakikisha wanasoma mapato na matumizi kwa wananchi dhidi ya Miradi ya Maendeleo ili kujenga Mazingira mazuri ya  uwazi na Uwajibikaji.