WAFANYABIASHARA WAKUMBUSHWA KULIPA KODI

Imewekwa Tarehe: June 22nd, 2021

Kupitia Radio Chai 105.7 Mhz, Wafanyabiashara katika Halmashauri ya wilaya ya Rungwe wamekumbushwa kuendelea kuhuisha Leseni zao za biashara ikiwa ni pamoja na kupata leseni mpya kwa wale ambao wameshindwa kufanya hivyo ili kujijengea mazingira mazuri ya kufanya shughuli zao za kila siku katika hali ya utulivu.

 Kuelekea Mwisho wa mwaka wa fedha Kiserikali, afisa biashara wilaya bwana Lodrick  Yesaya  Mwakisole pia ameomba wapangaji wanaotumia vibanda vya halmashauri kuhakikisha wanalipa kodi yao mapema ikiwa ni pamoja na  na wale wanaotakiwa kulipa ushuru wa huduma (service levy) kufanya hivyo ifikapo june 23 mwaka huu.

Pamoja na hayo  bwana Mwakisole amesema kuwa wajasiriamali wote  katika Halmashauri ya Wilaya ya Rungwe  wenye nia ya kushiriki maonesho ya sabasaba mwaka huu  ambayo kitaifa yatanyika jijini Dar es salaam wanatakiwa kufika katika ofisi ya Mkurugenzi Kitengo cha Biashara ili kupata namna bora ya kushiriki maonesho hayo .

Aidha amewakumbusha  kuendelea kupata vitambulisho vya ujasiriamali  ambavyo kwa sasa vinapatikana  kwa njia ya mfumo ambapo kupitia   simu ya mkononi mnufaika anaweza kujisajili mwenyewe. Pia anaweza kupata msaada wa karibu kupitia kwa watendaji wa kata waliopo katika  maeneo yao. Kitambulisho hiki tofauti na cha awali kina picha ya mnufaika.