VISHIKWAMBI KUBORESHA ELIMU SHULENI

Imewekwa Tarehe: January 13th, 2023

Mkuu wa Wilaya ya Rungwe Mhe. Dkt Vicent Anney  Leo tarehe 13.01.2023 ameongoza zoezi la ugawaji wa vishikwambi (Tablets) kwa walimu wa shule za Msingi na Sekondari katika Halmashauri ya Wilaya ya Rungwe ikiwa ni nyezo muhimu ya kuboresha Ufundishaji na ujifunzaji kwa Wanafunzi.

katika zoezi hilo  Mhe. Anney ameagiza kila Mwalimu kwenda na  kuvitumia vishikwambi hivyo kwa malengo mahususi yaliyotarajiwa huku akieleza kuwa kila Mwezi Kutakuwa na uhakiki wa uwepo na Matumizi  sahihi ya vifaa hivyo katika shule zote.

Mhe. Anney ametaja matumizi ya vishikwambi hivyo kuwa ni pamoja na  kuandaa Masomo kwa  kutumia vyanzo mbalimbali vya maarifa kwa njia ya mtandao, na kuandaa taarifa na kuzituma katika ngazi mbalimbali za kitaluma.

Katika hatua nyingine Mhe.  Anney ameagiza wanafunzi wote WALIOCHAGULIWA KUJIUNGA na kidato Cha kwanza sambamba na Wale waliofikia umri wa kusajiliwa darasa la  kwanza kufanya hivyo na kupokelewa na shule husika  bila masharti yeyote ikiwa ni haki ya Msingi na stahiki kwa mwanafunzi.

Akifungua kikao hicho Kaimu Mkurugenzi Halmashauri ya Wilaya ya Rungwe  Bwana Castory Makeula ametaja jumla ya vishikwambi 1131 kuwa vitapelekwa katika shule mbalimbali ili kuboresha elimu  na hivi karibuni vingine vinatarajia kupokelewa kutoka Serikali kuu na vitasambazwa shuleni.