UVAAJI SAHIHI WA BARAKOA WASISITIZWA

Imewekwa Tarehe: May 5th, 2020

Noah kibona, Rungwe Dc

Imeelezwa kuwa uuzaji wa barakoa usiofuata kanuni za afya unaweza kuchangia maambukizi na kuenea kwa virusi vya COVID 19 miongoni mwa watumiaji nchini Tanzania.

Rai hiyo imetolewa  na Mkurugenzi Mtendaji halmashauri ya wilaya ya Rungwe bibi Loema Peter  wakati akiongea na watumishi wa halmashauri hiyo ikiwa ni sehemu ya kupeaana elimu dhidi ya ugonjwa hatari wa corona ambao kwa sasa umefanikiwa kuenea ulimwenguni kote.

 Aidha bibi Loema amewaomba wauzaji wa barakoa kutoruhusu wateja wao kujaribisha na kisha kuirudisha kama haimtoshi kwani kwa kufanya hivyo itachangia maambukizi ya COVID 19.

Pamoja na hayo amesisisitiza kuwa uvaaji wa barakoa kwa kuiegesha chini ya kidevu na juu ya paji la  uso na kisha kuirudisha mdomoni  inaweza kuwa  moja ya ukiukwaji wa kanuni za uvaaji wa barakoa miongoni mwa watumiaji.

Akichangia zaidi Mganga mkuu wa halmashauri ya wilaya ya Rungwe Dr. John Mrina amewaomba watumiaji kuhakikisha wanavaa barakoa hizo siyo zaidi ya masaa manne  na kisha kuziteketeza ili kuepuka uwezekano wa kuenea kwa virusi  hivyo.

Hata hivyo Dr..Mrina  amewaasa wakazi wa wilaya ya Rungwe kuhakikisha wanakula vyakula vyenye viini lishe kwani kwa kufanya hivyo itasaidia kuimarisha kinga ya mwili.

Katika halmashauri ya wilaya Rungwe zoezi la upimaji wa joto kubaini dalili za ugonjwa wa Corona unaendelea maeneo mengi ikiwemo hospitali ya wilaya Tukuyu, ambapo kituo cha afya Isongole  kimeteuliwa kutumika  kuwahudumia washukiwa wa Covid 19.