KAMATI YA BUNGE YAPONGEZA UJENZI WA BARABARA YA MASEBE -LUTETE

Imewekwa Tarehe: March 15th, 2022

Kamati ya Uongozi na Serikali za Mitaa ya Bunge la Jamhuri ya Mungano wa Tanzania leo tarehe 15.03.2022 ikiongozwa na Mwenyekiti wake Mhe. Abdala Chaurembo (MB) Mbele ya Waziri wa Ofisi ya Rais TAMISEMI  Mhe. Inocent Bashungwa imefanya ziara katika Halmashauri ya Wilaya ya Rungwe na kukagua barabara ya kiwango cha Lami (MASEBE-LUTETE KM 7 na MPUGUSO- BUGOBA KM 5).

Katika Ziara hiyo kamati  imepongeza ujenzi wa barabara hiyo kwani kwa kufanya hivyo wakazi wa kata ya Mpuguso, Ilima na Kisondela wamefunguliwa fursa ya kiuchumi sambamba na ustawi wa jamii katika utoaji wa huduma ya afya, elimu, kilimo, ufugaji na uwekezaji katika sekta ya Viwanda.

Aidha Waziri wa Ofisi ya Rais TAMISEMI  Mhe. Inocent Bashungwa ameileza kamati hiyo kuwa Serikali Kupitia TANROAD  ipo mbioni kukamilisha kipande cha Mita 800 kilichobaki kuanzia Ushirika mpaka Shule ya Msingi Masebe ili kuifanya barabara hiyo kupitika kwa urahisi  kwa zaidi ya km 8.

Hata hivyo Mkuu wa mkoa wa Mbeya Mhe. Juma Homera ameieleza kamati hiyo kuwa barabara zote zinazojengwa kwa kiwango cha lami imeelekezwa kuwekewa taa za barabarani ili kuongeza usalama wa uraia na mali zao wakati wa usiku na tayari baadhi ya miji maelekezo hayo yameanza  kutekelezwa.

Barabara ya Masebe- Lutete- Bugoba imejengwa na Wakala wa barabara vijijini (TARURA)  kwa msaada wa Umoja wa Ulaya (EUROPEAN UNION) na imegharimu zaidi ya shilingi Billion 2.5.