HALMASHAURI YA ( W) RUNGWE YAPATA HATI SAFI

Imewekwa Tarehe: May 6th, 2020

HALMASHAURI YA WILAYA YA RUNGWE YAPATA HATI SAFI YA UKAGUZI

Imefahamishwa kuwa umoja  na mshikamano miongoni  mwa watumishi  wa umma ndiyo njia pekee itakayosaidia halmashauri yeyote kupata  hati safi ya ukaguzi na hivyo kuleta taswira chanya kwa wananchi wake.

Rai hiyo imetolewa na Mkuu wa mkoa wa Mbeya Mhe. Albert Chalamila wakati akihutubia kikao cha Baraza la madiwani (baraza la  kujadili hoja za mkaguzi wa nje) lililofanyika katika ukumbi wa chuo cha ualimu Tukuyu ambapo pamoja na mambo mengine ameipongeza halmashauri ya wilaya ya Rungwe kwa kupata hati  safi kwa msimu wa 2018/19.

Aidha mh. Chalamila amewaomba watalaamu wa halmashauri hiyo kuendelea  kuwa wakali  wakati wa   ukusanyaji wa  mapato  huku akisistiza  kuwa vikundi vyote vilivyopata mikopo  ya halmashauri na kushindwa kurejesha kwa wakati vipelekwe mahakamani ili fedha hizo ziweze kutumika  kuwakopesha wanufaika wengine.

Pamoja na hayo Mh. Chalamila ameupongeza utawala wa halmashauri hiyo kwa kusimamia miradi ya maendeleo kwa ufanisi mkubwa huku akimpa kongole Mkurugenzi wa halmashauri ya wilaya ya Rungwe bibi Loema Peter kwa kusimamia ipasavyo  ujenzi wa  jengo la mama na mtoto lililopo katika hospitali ya wilaya Tukuyu ambalo mpaka mpaka sasa sehemu ya jengo hilo imenza kutumika.

UGONJWA WA CORONA

Akizungumzia maambukizi ya ugonjwa wa corona Mhe. Chalamila ameomba wakazi wa wilaya ya Rungwe kuendelea kuwa watulivu huku wakiendelea kuchukua tahadhari zinazostahiki.

“Ugonjwa huu hauchagui rangi wala kipato cha mtu ndiyo maana siyo rahisi kusikia mgonjwa akiomba akatibiwe nje ya nchi  kote kumeshindikana” alisisitiza.